ڕۆژنامەی شەرقولئەوسەت دەڵێت، حکومەتى عێراقى داوایەکى حکومەتى هەرێمى کوردستانى رەتکردەوە سەبارەت بە دواخستنى سەرژمێریی لەو ناوچانەى کە بەناوچە ناکۆکیی لەسەرەکان ناسراون.
رۆژنامەکەلە ژمارەی ئەمڕۆیدا نووسیویەتى، مادەى 140ـى دەستوورى هەمیشەیی عێراق تایبەتە بەو ناوچانە و بەگوێرەى بڕگەکانى ئەو مادەیە دەبوو پێش لە وادەى کۆتایی هاتنى ساڵی 2007 قۆناغەکانى ئاساییکردنەوەى ئەو ناوچانە و سەرژمێریی و راپرسی لەو ناوچانەدا جێبەجێبکرایە، بەڵام نەکراوە، بڕیاریشە لە چەند رۆژى داهاتوودا سەرژمێریی سەرتاسەریی لە عێراق بەڕێوەبچێت و سەرجەم ئامادەکارییەکانى تەواوکراون.
فەهمی بورهان، سەرۆکی دەستەى ناوچە کوردستانییەکانى دەرەوەی ئیدارەى هەرێمى کوردستان داوایەکی لەبارەى دواخستنى پرۆسەکە لەوناوچانە داوە بە بەغدا، بەڵام حکومەتى ناوەندى داواکەى رەتکردوەتەوە.
رۆژنامەکە ئاماژەى بەوەشکردوە سوننەکانیش هەمان داوایان کردوە بۆ یەکلاییکردنەوەى ئەو ناوچانەى ناکۆکیان لەسەرە، لەگەڵ شیعەکان، بەڵام وەزارەتى پلاندانان رایگەیاندووە، سەرژمێریی لە وادەى خۆیدا ئەنجام دەدرێت لە سەرتاسەرى عێراقدا بە هەرێمى کوردستانیشەوە.
