میدیای نزیک لە پەکەکە بڵاویکردەوە، ئاسایشی هەولێر، بە زۆر نوێنەرایەتی هەدەپە و ئەندامەکانی ناچار کردووە بچنە ناو ئۆتۆمبێل و لە هەولێر دووریان بخەنەوە، بریاریشە نوێنەرایەتییەكە لە دژی ئەو کردەوەیە لە پارکی ئازادیی شاری سلێمانی کۆنگرەیەکی ڕۆژنامەنووسیی ئەنجام بدەن.
ئاژانسی رۆژ نیوز بڵاویکردەوە جارێکی دیکە ئاسایشی پارتی لە هەولێر ڕێگریی لە ئازادییخوازان کرد کە کاری سیاسیی خۆیان بکەن، لەو چوارچێوەیەشدا پارتی نوێنەرایەتی هەدەپەی لە باشووری کوردستان و ئەندامەکانی لە هەولێر بەرەو سلێمانی دوور خستووەتەوە.
بەپێی زانیارییەکانی ڕۆژنیوز، دوای ئەوە ئاسایشی هەولێر بە زۆر بانگی حیکمەت هاتیب نوێنەری هەدەپە لە باشووری کوردستان و هەریەک لە ئایدن یاڵڤاچ، سدقی ڤاکار و ناسر یاغز، ئەندامانی نوێنەرایەتییەكەی کردووە و پاشان بە زۆر دەیانخەنە ناو دوو ئۆتۆمبێلی جیاوازەوە و بە زۆر ڕەوانەی سنووری پارێزگای سلێمانییان دەکەن.
تا ئێستا حکومەتی هەرێمی کوردستان و هەدەپە هیچ ڕوونکردنەوەیەکیان لە بارەی ئەو کردەوەیەی ئاسایشی پارتی بڵاونەکردووەتەوە.
