پێدانى پاسپۆرتى دیپلۆماسی بە پەرلەمانتارانى کوردستان لە هەموارى یاسای پاسپۆرتى عێراق زیاد دەکرێت، کە تەنیا دەنگدانى ماوە بۆ ئەوەى کارا بێت.
لە هەموارى یاساى پاسپۆرتى عێراق کە ئێستا لە پەرلەمانى عێراقە، مادەیەک بۆ یاساکە زیاد کراوە و تێیدا ئەو کەسانە دیاری دەکرێن کە پاسپۆرتى دیپلۆماسییان پێ دەدرێت.
بەگوێرەى پڕۆژەیاساکە کە لە ئەنجوومەنى وەزیرانى عێراقەوە بۆ پەرلەمان نێردراوە، هەریەک لە سەرۆکى هەرێمى کوردستان، سەرۆکى حکومەتى هەرێمى کوردستان و جێگرانى و وەزیرەکانى حکومەت، ئەوانەش کە پلەى وەزیریان هەیە لە هەرێمى کوردستان پێدانى ئەو جۆرە پاسپۆرتە دەیانگرێتەوە.
سەگڤان سندی، جێگرى سەرۆکى لیژنەى ئاسایش و بەرگریى پەرلەمانى عێراق دەڵێت "لە گفتوگۆى لیژنەکەیان لەسەر ئەو هەموارە ئەوە زیاد کراوە کە پاسپۆرتى دیپلۆماسی بدرێتە ئەندامانى پەرلەمانى کوردستانیش، کە پێشتر لە پڕۆژەیاساکەدا نەبووە."
