وەزارەتی ناوخۆی هەرێم نووسراوی فەرمی بۆ پارێزگاو ئیدارە سەربەخۆکانی هەرێم ڕه‌وانه‌ده‌كات‌و ڕایاندەسپێرێت، ڕێکاری یاسایی بەرامبەر ئەو فرۆشگایانە بگرنەبەر، کە سیمکارت دەفرۆشن بێ پڕۆسەی تۆمارکردنی یاسایی.
له‌ڕاگه‌یه‌نراوێكدا وەزارەتی ناوخۆ ئاشكرایكردووه، بەمەبەستی خێراکردنی ڕێوشوێنەکانی کۆنترۆڵکردنی فرۆشتنی سیمکارت لەدەرەوەی ڕێوشوێنی یاسایی تۆمارکردن، لیژنە تایبەتمەندەکان لەپارێزگاو ئیدارە سەربەخۆکان ڕاسپێردران کە ڕێکاری یاسایی بەرامبەر هەر فرۆشگایەک بگرنەبەر، کە سیمکارت دەفرۆشن بێ پڕۆسەی تۆمارکردنی یاسایی.
له‌و ڕاگه‌یه‌نراوه‌دا وەزارەتی ناوخۆ وتوویه‌تى، "لەسەر ئەم بابەتە سزای ژمارەیەک فرۆشگا دراون‌و داخران، بەدواداچوونی ڕۆژانەش بەردەوامە، ڕێوشوێنی یاسایی تووند لەبەرامبەر هەر کەس‌و فرۆشگاو بریکارێک دەگیرێتەبەر کە سیمکارت لەبازاڕ بفرۆشێ‌و بەناوی کڕیار تۆماریان نەکات".
ئه‌وه‌ش هاتووه، "فرۆشتنی سیمکارت لەبازاڕ بێ تۆمارکردن، دەرگاکردنەوەو دەرفەت دروستکردنە بۆ تاوانکاران، تاوەکو بەو سیمکارتانە تاوان بکەن‌و هەوڵبدەن خۆیان لەیاسا بشارنەوە، ئەمەش بەشداریکردنە لەتاوان‌و وەزارەتی ناوخۆ ڕێکاری یاسایی دەگرێتەبەر بۆ پاراستنی هاووڵاتییان".
وه‌زاره‌تى ناوخۆى ئه‌وه‌شى به‌بیرهێناوه‌ته‌وه، بەگوێرەی بڕگەی دووەم لەمادەی 6 لەڕێنمایی وەزارەتی ناوخۆ، ژمارە 8ی ساڵی 2021ی هەموارکراو، سەرپێچیکار بەرامبەر هەر سیمکارتێکی دەستبەسەرداگیراو بڕی سێ ملیۆن دینار سزا دەدرێت.
یەکێکی دیکە لەو خاڵانەی وەزارەتی ناوخۆ کۆمپانیاکانی ناچار بەجێبەجێکردن دەکات، ئەوەیە، بریکارە سەرەکی‌و لاوەکییەکانی فرۆشتنی سیمکارت دەبێت فۆڕمی خۆتۆمارکردن پڕبکەنەوە، بەپێچەوانەوە بریکاردارێتی فرۆشتنی سیمکارتی لێ وەردەگیرێتەوە.
